Nakalulungkot at nakagagalit na sa araw ng State of the Nation Address (SONA) ng rehimeng Marcos Jr., patuloy na nakakaranas ang milyun-milyong pamilyang Pilipino ng labis na pasanin sa mataas na singil sa kuryente—isang direktang bunga ng mga patakarang neoliberal na ipinagpapatuloy at pinasisigla ng kasalukuyang administrasyon.
Ayon sa pinakahuling ulat ng IBON Foundation, ang Pilipinas ang may pinakamataas na singil sa kuryente sa buong Southeast Asia, na pumalo sa average na P12.43 kada kilowatt-hour (kWh), at lumampas pa sa Singapore. Anila, ang 25-taong pagpapatupad ng EPIRA o Electric Power Industry Reform Act ay pabor lamang sa tubo ng malalaking korporasyon imbes na magbigay ng abot-kayang kuryente.
Ang mga numerong ito ay hindi lamang istatistika—sila ay dagok sa bulsa ng bawat pamilyang nagsisikap magbayad ng ilaw habang lumulubog sa utang, sa mga estudyanteng hindi makapag-aral sa dilim, at sa mga manggagawang pinipiga ng sistema.
ANG TUNAY NA HILING NG MAMAMAYAN SA DARATING NA SONA 2026
Sa darating na SONA, malinaw ang gustong marinig ng mamamayan: Ibasura ang EPIRA Law at alisin ang VAT sa langis at kuryente. Hindi na kailangan ng mga panibagong pangako o mga palabas na proyekto. Kailangan ay kongkretong aksyon para wakasan ang 25 taong pagsasamantala sa ilalim ng EPIRA at ang patuloy na pagpataw ng regresibong buwis sa mga pangunahing pangangailangan.
Ang EPIRA ang siyang nagbigay-daan sa pagkontrol ng iilang malalaking oligarkiya at dayuhang korporasyon sa industriya ng kuryente. Ito ang nagtulak sa patuloy na pagtaas ng singil, nagpahina sa kapasidad ng estado na magregula, at ginawang negosyo—hindi serbisyo publiko—ang batayang pangangailangan sa enerhiya.
MARCOS JR: INUTIL AT MANHID SA MAMAMAYAN, PERO MASIGASIG NA TAGAPAGTANGGOL NG OLIGARKIYA
Maliwanag ang larawan: Inutil at manhid ang rehimeng Marcos Jr. sa karaingan ng mamamayan, pero masigasig itong tagapagsulong ng neoliberal na patakaran na nakikinabang sa mga malalaking oligarkiya at dayuhan.
Habang naghihirap ang taumbayan sa ilalim ng napakataas na presyo ng kuryente, langis, bigas, at batayang bilihin, ipinagpapatuloy ng administrasyon ang mga patakarang nagpapayaman sa iilan. Ipinagbubunyi pa nito ang mga dayuhang pamumuhunan na dumarambong sa ekonomiya ng bansa at patakarang deregulasyon—ang mismong mga mekanismo ng pagsasamantala.
Wala itong pakialam sa mga pamilyang pinipiling patayin ang ilaw para makatipid, sa mga maliliit na negosyong nagsasara dahil sa taas-presyo, o sa mga komunidad na walang koneksyon sa kuryente dahil hindi kumikita ang mga korporasyon na magdala ng serbisyo sa kanila.
PANAWAGAN NG BAYAN
Kaya naninindigan ang BAYAN sa mga sumusunod na panawagan:
– Ibasura ang EPIRA Law! Ibaling ang kontrol at operasyon ng industriya ng kuryente sa kamay ng estado bilang tunay na serbisyo publiko.
– Alisin ang VAT sa kuryente at langis! Buwagin ang regresibong buwis na pumipighati sa mga mamamayan.
– Kondenahin at itigil ang neoliberal na mga patakaran! Wakasan ang deregulasyon, pribatisasyon, at liberalisasyon na siyang ugat ng krisis sa enerhiya at pangkabuhayan.
– Panagutin ang mga oligarkiya at dayuhang korporasyong nagsasamantala! Imbestigahan ang kartel sa langis at kuryente, at bawiin ang mga kontrata at pribilehiyong ipinagkaloob sa kanila.
– Isakatuparan ang polisiya at maglaan ng sapat na pondo para sa pambansang industriyalisasyon at tunay na energy independence! Gamitin ang yaman ng bansa para sa kapakanan ng mamamayan, hindi sa tubo ng iilan.
Hindi na makatarungan at hindi na natin matiis ang kalagayan. Ang SONA ay dapat maging pagkakataon para pakinggan ang hinaing ng bayan, hindi para ipagmalaki ang mga patakarang pumapatay sa ating mga kababayan sa kahirapan.
Sa mga darating na araw, lalong paiigtingin ng BAYAN at ng mga sektor ng mamamayan ang kampanya laban sa EPIRA, laban sa VAT, at laban sa neoliberal na rehimen. Ang pagkilos sa lansangan ang siyang tunay na State of the Nation.
Ibaba ang presyo ng kuryente at langis! Ibasura ang EPIRA! Alisin ang VAT! Serbisyong publiko, hindi negosyo!